ضحية جديده لسنة رابعة ابتدائي

بداءنا القصيده بمذاكرة الدراسات الاجتماعية. وبما اني لا افقه شيئ في هذه المادة عشان ما درستهاش قبل كده..يتولي هذه المهمة ابوها.

وبدأنا المنهج بفهم معني الخريطه وبكل تفاؤل قرر ابو لولي يتوسع في شرح النيل جاي منين وبيصب فين..وشرح مثال على ميل الأرض عشان كده المياه بتروح لاتجاه الشمال. ثم سأل ” يبقى تفتكري ليه يا لولي المياه بتصب في البحر المتوسط؟”

وجائت الاجابه الغير متوقه. ..”عشان البحر مالح يا بابا”

بصراحة بصينا لبعض وانفجرنا في الضحك وعرفنا أن السنه دي هتكون سوده.

Advertisements

هواجس إعداديه

نموذج اسئلة دراسات للصف الثالث الاعدادي من كتاب الوزارة..

قارن بين نيجريا وامريكا من حيث السكان والمساحة والموقع الفلكي!!

مش قادرة افكر في شتيمة مناسبة للي تفتق ذهنه عن سؤال زي ده!!

يعني المفروض الطالب يحفظ مساحة كل بلد من ال 5 اللي درسناهم  وعدد السكان وفقا لتعداد 2014 وموقع الفلكي يعني تمتد من دائرة  عرض كام لدائرة كام وخط طول كام

في اطار مذاكرة الدراسات اخر لحظة.. ابني قرر يتعلم الكتابة بالرقعة وعمل ابحاث في الشكل الامثل للحروف  ومداولات مع كل من في البيت في مقارنة الحروف ببعضها

نسيت اقول لكم..الامتحان بكرة الصبح على فكرة

. بما ان الخبيز هو متنفسي الوحيد لسة بافكر .. يا ترى ايه المكونات المتاحة عندنا لعمل اي حاجة وخاصة اما طلعت نيويورك اهم مواني نيجيريا

اتفضلوا معانا!

همزة الالف

المدام بتاعة زاززو قررت تبقي كرييتيف فقالت لهم الالف عليها همزة عشان ما يجيش عليها شمس و مطر
وهنا لنا وقفة…
زازو من امبارح شايل الهم وبيسأل يا ترى الالف اللي تحتها همزة بتعمل ايه في الشمس و المطر

دي علامة يا مارد

​امبارح بنذاكر جغرافيا فسوفي اشتكى انه دايما مش بيعرف يحل سؤال الخرايط لانه مش بيكون عارف دي بتاعت ايه 

فقررت اعلم كل واحدة بعلامة

يعني اللي فيها البحر الاحمر على الشمال تبقى اسيا واللي البحر الاحمر فيها على اليمين تبقى افريقيا (سيبكم من اننا تناقشنا في اختلاط خليج السويس والعقبة بفرع رشيد ودمياط وان دي مش اسماء تانية ولا حاجة)

نيجي لاوروبا حاولت اشوف لها اي علامة ما عرفتش .. فقلت له انت شايفها شبه ايه يا سيف؟

 قال شبة ست لابسة dress كامل وطويل  قلت ماشي( مع اني مش شايفة حاجة ) فشعر اني مش شايفاها فقعد يشاور ويوصف وتطورت الحداث انها طلعت بطنها انفجرت ومصارينها طلعت

طبعا تناقشنا في المرة المليون ان السعودية في اسيا مش افريقيا واندهش جدا كالعادة وفاصل وقاوح واعترض ودي مناقشة خضناها قبل كدة في 6 ابتدائي وموثقة فيblog

انا محتاجة علاج نفسي باين تقريبا

لا سهل

قلت لأختكوا كوكو:
” يا حبيبتي خدتي المبتدأ و الخبر و الاعراب بتاعهم؟”
قالت لي “اه درس عبيط جدا مش فاهمة منه و لا كلمة”
استعننا على الشقاء بالله

قناة السويس

كوكو بتذاكر اول درس في الدراسات
بيقولوا فيه موقع مصر اتحسن اوي بعد وجود قناة السويس

قالت لي اوكيه و ما سألتنيش اي سؤال قلت جميل بنتي مثقفة و عارفة قناة السويس
و بعدين اتوغوشت كدة قلت لها هي ايه قناة السويس دي
قالت لي زي براعم كدة… ابقي هاتيها لنا
و هنا توقفت عن الكلام و بدأت اصوت…
براعم ايه الهي تتبرعمي انتي و عيلتك
قالت لي ايه قناة عملوها عشان يتكلموا عن مصر و كدة و يمكن يجيبوا فيها كارتون

ميرسي كتير…الدراسات اتضربت من اولها

مين الراجل دع؟؟

سو – مين اللي قتل توران شاه يا سوفي؟
(بعد محاولات اجابة كلها خطأ)
سو – هو مين توران شاه اصلا؟
سوفي- ده ابو..
سو – لا
سوفي – طب جوز..
سو -لا
سوفي – مستحيل يكون لا ابو ولا جوز .. ايه الراجل ده

انت سااامعنيييي؟؟

اكتشفت مؤخرا أن سوفي ما بيسمعنيش لو حاطت الباتش بتاعة عينه.
هو مش معترف انه مش سامع بس هو بالفعل مش سامع … قاعدة جنبه اقول الكلام وهو مافيش خالص

من يومين كنت باقوله تاخد بريك نص ساعة وبعدين نذاكر .. رد: لا
قلت له لا دي  على المذاكرة بشكل عام ولا اعتراض على قصر البريك ولا عايز تقوم تذاكر دلوقتي ؟
رد: مش عارف
انا: هو انت بتقول لا على ايه طيب؟
رد: mummy , u r confusing me
انا: انا برضة !😐

هو حافظ .. طالما الجملة فيها مذاكرة يبقى اكيد الرد لا بغض النظر الكلام على ايه. 😅

الحنية سوفي

النهاردة سوفي ساعدني في عمل الغدا وعمل لنا ليموناضة كمان فكان سعيد بنفسه جدا وحاسس بالانجاز

بعد الغدا جه يقعد في حضني في لحظة صفا  وبيسألني: قاعدة في السرير ليه يا ماما
فقلت:  اصل بطني وجعاني وضهري كمان فقلت اريح شوية
فرد بكل براءة: تفتكري يا ماما لما تكبري وتعجزي فيه احتمال تتشلي وتبقي مش قادرة تقومي من السرير ؟
طبعا انا في سري باقول لا  مش محتاجة اعجز دي حاجة انت كفيل بيها وقريب كمان…ما علينا ما حبتش افسد اللحظة ورديت: ربنا يستر .. كل شئ جايز
قال: و هاتعملي ايه ساعتها؟
انا : العمل عمل ربنا .. تفتكر اعمل  ايه؟
هو: طبعا هاخلي بالي منك بس المشكلة لو كنت متجوز ومخلف مش عارف هاعمل ايه!
انا : مش عارفة .. تفتكر ايه؟(طبعا بدأت اشتم في سري)
هو: هاضطر بأة اخدك عندي او اجي اعيش معاكي اعمل حاجتك.
انا : بتهيألي الافضل اني اموت قبل ما اتشل يا سوفي
هو: لا يا ماما مش عايزك تموتي
انا: ربنا يسهل 🙄

الواد ده حنين وطيب وحبوب بس عايز ضبط زوايا في الكلام
و يا حبيبي لما لقاني تعبانة قام شطب المواعين ودعك الطاسة الجريل السيراميك بالسلكة وعمل لي الشاي ودلعني اخر دلع.

حوار أمهات على حافة الهاويه

سو: بكرة امتحان فرنش والمذاكرة زفت ومتخانقين من اول النهار ووصلنا اني اقول من الصبح انا مش عايزة اسمع اي اسئلة من اي نوع برة المذاكرة
ييجي السؤال في وسط الحل ومحاولة التركيز على الحاجات اللي تلم نمر ييجي السؤال
هو لو في انفجار نووي وقبل الانفجار على طول حطينا حتت حديدة كبيرة اوي على القنبلة.. يحصل ايه؟ 😳

دي: احية… احييييييية… احييييييييييييييية
الواد ده تفوق على جميع اطفال العالم. انت ضغطك عالى على طول …دى اقل حاجة….مش كدة؟؟

نرمو: بس تصدقي سؤال!! الا هو ماشفش فيلم xmen days of future past؟

سو: بصوا انا انهاردة عندي صدمة لأنه معايا من اول النهار في الشغل. ومش عاجبه اي حاجة باقولها ولو قعدت جنبه مش عاجبه. من الاخر كده هو مش طايقني ولا انا طايقاه

دى: روحى اعملى meditation
فكك منه…و نامى. صحتك يا ولية. دة احنا بنتشل هنا و مش قاعدين معاكم. ايه يا شيخة! (سعيد صالح ستايل)

نرمو: مره جوزي رجع لقاني انا وسيسو قالبين وشنا على بعض.قال لي مالكم… قلت له اطلقنا😂😂😂

سو: لا انا جوزي بطل يسأل السؤال ده.. استبدله ب ذاكرتم كويس انهاردة مش كدة؟ ده حتى لو دخل لقاني باعيط او بزعق…هو نفس السؤال😅

وهكذا انتهى الحوار ونلقاكم في حديث اخر! 😅