عربي ماما بعافية

وبما اننا سهرانين لحد دلوقتي بسبب الحرارة 🤒، دار الحوار اللطيف دا بيني وبين بودي (٣ سنوات) وهو مركز في أولد ماكدونالد على الموبايل بمناسبة البوتي ترينينج 🚽 اللي مش راضي يخلص:

انا: بودي… مش عايز نعمل بيبي يا حبيبي؟
عبد الله: ماشي.
انا بمنتهى السعادة والإحساس بالانتصار😏😀: طيب يلا بينا نعمل بيبي.
بودي: لا ماشي مش عايز.
انا وانا كلي خيبت أمل 😳😳: اه معلش احنا قارفينك معانا بالموضوع ده.
بودي: ماشي ماشي .

ارحمني يا رب 🤐🤕

باط كل الناس

كنت في مشوار في وسط البلد في شارع طلعت حرب مع سوفي ركنا في باركينج عمر مكرم ومشينا. طبعا انبهر بالشوارع لانها اول مرة في حياته ينزل وسط البلد.

وفي نهاية الجولة واحنا في طريقنا للعربية قال لي
ماما في حاجة غريبة هنا
قلت ايه يا سوفي?

رد… وانا ماشي كدة قادر اشم ريحة باط كل الناس!!! ازاي كدة?! احنا بنلعب كورة وبنبقى ماشيين في لاين ومش باشم الريحة دي. بس هنا الناس مش جنبي و بردة شاممهم.

الواد ده متغيرش كثير… ومش مستغربه…لأنه هو
نفس الشخص اللي من 14 سنة رجع من رحلة جنينة الحيوانات بتعليق ان الفيل محتاج يحط كريم في ركبه

🤣🤣🤣

🤣

اللانش بوكس

بعد خناقات صباحية مستديمة بسبب البطء الصباحي اللي ح يفوت الباص .. ابني اخد قرار اني مش لازم اصحى الصبح معاه عشان اصحيه .. هو ح يظبط المنبه ويصحى لوحده وينزل.

عند هذه النقطة عملت فرح وبقيت اعمل لانش بوكس من بالليل (السندوتشات والخيارة وعلبة لبن بالشيكولاتة أو الفراولة) هو الصبح بأة بيطلعهم من البوكس وياخدهم في كيس وينزل 😂😂

ذاكر برة الصندوق

زاززو ابتدي يفكر برة الصندوق عشان يضيع وقت و ما يعملش الدوفوار…بعد ما خلص إنه عايز ياكل و يشرب و يعمل بيبي و يصلي العشا في الجامع…قرر إنه عايز أخ…

#يا_زين_ما_ربيتي_يا_نيفو
#ذاكر_برة_الصندوق
#يا_رب_المدارس_تموت

يا زين ما ربيتي يا نيفو

طلعت علي خناقة زاززو و كوكو
كوكو- a deal is a deal لازم تعمل اللي اتفقنا عليه
زاززو- a deal is not a deal و لا حاجة و ماليش دعوة
أنا بقي قررت ان ده وقت مناسب لجلسة تربوية و درس اخلاقي من بتوع حديث الثلاثاء
أنا – بص يا حبيبي الإنسان المحترم لما يتفق علي حاجة لازم يعملها مهما كان مش عايز
زاززو – أنا عمري ما كنت إنسان محترم…
بصراحة افحمني بكمية السلام النفسي اللي عنده و اعتزازه بسفالته فخدت بعضي و مشيت…

#حديث_الثلاثاء
#يا_زين_ما_ربيتي_يا_نيفو

اول امتحان لزازو

*امتحنت يا زاززو؟
-لأ
*يعني محدش اداك تحل حاجة؟
-لأ
*عربي مثلا؟
-آاااه حلينا عربي
*طب كانوا عايزينك تكتب ايه؟
-عربي…هكتب ايه يعني…عربي
*ايوة فاهمة يعني سألوكوا في إيه؟
-محدش سألنا في حاجة
*يعني يا حبيبي ام الورقة كان مكتوب فيها ايه؟؟؟
-مكتوب فيها عربي عربييييي

ضحية جديده لسنة رابعة ابتدائي

بداءنا القصيده بمذاكرة الدراسات الاجتماعية. وبما اني لا افقه شيئ في هذه المادة عشان ما درستهاش قبل كده..يتولي هذه المهمة ابوها.

وبدأنا المنهج بفهم معني الخريطه وبكل تفاؤل قرر ابو لولي يتوسع في شرح النيل جاي منين وبيصب فين..وشرح مثال على ميل الأرض عشان كده المياه بتروح لاتجاه الشمال. ثم سأل ” يبقى تفتكري ليه يا لولي المياه بتصب في البحر المتوسط؟”

وجائت الاجابه الغير متوقه. ..”عشان البحر مالح يا بابا”

بصراحة بصينا لبعض وانفجرنا في الضحك وعرفنا أن السنه دي هتكون سوده.

هواجس إعداديه

نموذج اسئلة دراسات للصف الثالث الاعدادي من كتاب الوزارة..

قارن بين نيجريا وامريكا من حيث السكان والمساحة والموقع الفلكي!!

مش قادرة افكر في شتيمة مناسبة للي تفتق ذهنه عن سؤال زي ده!!

يعني المفروض الطالب يحفظ مساحة كل بلد من ال 5 اللي درسناهم وعدد السكان وفقا لتعداد 2014 وموقع الفلكي يعني تمتد من دائرة عرض كام لدائرة كام وخط طول كام

في اطار مذاكرة الدراسات اخر لحظة.. ابني قرر يتعلم الكتابة بالرقعة وعمل ابحاث في الشكل الامثل للحروف ومداولات مع كل من في البيت في مقارنة الحروف ببعضها

نسيت اقول لكم..الامتحان بكرة الصبح على فكرة

. بما ان الخبيز هو متنفسي الوحيد لسة بافكر .. يا ترى ايه المكونات المتاحة عندنا لعمل اي حاجة وخاصة اما طلعت نيويورك اهم مواني نيجيريا

اتفضلوا معانا!

همزة الالف

المدام بتاعة زاززو قررت تبقي كرييتيف فقالت لهم الالف عليها همزة عشان ما يجيش عليها شمس و مطر
وهنا لنا وقفة…
زازو من امبارح شايل الهم وبيسأل يا ترى الالف اللي تحتها همزة بتعمل ايه في الشمس و المطر

دي علامة يا مارد

امبارح بنذاكر جغرافيا فسوفي اشتكى انه دايما مش بيعرف يحل سؤال الخرايط لانه مش بيكون عارف دي بتاعت ايه

فقررت اعلم كل واحدة بعلامة

يعني اللي فيها البحر الاحمر على الشمال تبقى اسيا واللي البحر الاحمر فيها على اليمين تبقى افريقيا (سيبكم من اننا تناقشنا في اختلاط خليج السويس والعقبة بفرع رشيد ودمياط وان دي مش اسماء تانية ولا حاجة)

نيجي لاوروبا حاولت اشوف لها اي علامة ما عرفتش .. فقلت له انت شايفها شبه ايه يا سوفي؟

قال شبة ست لابسة dress كامل وطويل قلت ماشي( مع اني مش شايفة حاجة ) فشعر اني مش شايفاها فقعد يشاور ويوصف وتطورت الحداث انها طلعت بطنها انفجرت ومصارينها طلعت

طبعا تناقشنا في المرة المليون ان السعودية في اسيا مش افريقيا واندهش جدا كالعادة وفاصل وقاوح واعترض ودي مناقشة خضناها قبل كدة في 6 ابتدائي وموثقة فيblog

انا محتاجة علاج نفسي باين تقريبا